Blwyddyn Newydd Dda

Croeso i 2009, a Blwyddyn Newydd Dda i bawb o ddarllenwyr y tudalennau hyn! Gobeithio fod y flwyddyn wedi dechrau'n hapus i chwi!

Mae El Jefe a Mujer Superior yn aml yn hoffi crwydro dros y flwyddyn newydd, a chafwyd hwy yn croesawu'r flwyddyn newydd hon ar strydoedd dinas Caerdydd.

Yr oedd parti mawr yno - ffair, rinc sglefrio ac olwyn fawr. Daeth miloedd ar filoedd at ei gilydd, yn bobl o bob oed, ac o bob lliw a llun. Yn eu canol yr oedd EJ a MS yn mwynhau eu hunain - nid yn mynd dros ben llestri cofiwch chi, dim ond mwynhau eu hunain yn fawr iawn!

Dim ond un broblem oedd, sef yr oerfel! Yr oedd y dymheredd gryn dipyn o dan y pwynt rhewi ac yr oedd golwg rhynllyd ar lawer.

Oedd hynny'n oeri brwdfrydedd EJ ac MS? Go brin! mae'n cymryd mwy nag ychydig oerfel i wneud hynny!

Blwyddyn Newydd Dda i chwi i gyd! Cewch ychwaneg o luniau parti'r brifddinas maes o law!

Dyn a dim digon i'w wneud!

Nid pob dydd yr ydach chi'n gweld wyneb Bart Simpson mewn Sultana Finger!

(Mae'n amlwg fod El Jefe ar ei wyliau.)

Mae rhai gwyrthiau'n amhosibl!

Wele, ar y chwith, un o anrhegion Nadolig Mujer Superior i El Jefe!

Fedrwch chi ddychmygu El Jefe mewn unrhyw le, dan unrhyw amgylchiadau, yn sefyll fel y cymeriad ar y clawr yma?

Wii think not!

Digwyddiadau rownd y deisen

Byddwch yn cofio'r deisen hardd hon a gafodd El Jefe a'i deulu yn anrheg gan Wendy, un o'r rhai sy'n cydweithio gydag El Jefe. Credwch fi, mae mor odidog ag y mae'r llun yn ei awgrymu, yn gampwaith cogyddol!

Wel, dros yr ŵyl, gwelsom bethau rhyfedd yn digwydd o'i hamgylch.

Ar fore dydd Nadolig, pwy ddaeth rownd o gefn y deisen ond tri nad oeddem wedi eu gweld ers y flwyddyn ddiwethaf, ers y Nadolig diwethaf i fod yn fanwl! Yr oedd y tri gŵr doeth wedi dod eleni eto i ymuno yn y dathlu!

Ni fu cymaint llawenydd yn El Castillio (cartref El Jefe) ers amser maith iawn. Yr oedd Mujer Superior yn ei dagrau, ac El Jefe yn llawenhau'n fawr.


Yr oedd Bandido (mab #2) o'r farn mai gwyrth fach Nadoligaidd oedd hon, a Rebelde (mab #3) yn dweud mai presenoldeb y 'Jesus Action Figure' yn y tŷ (gweler isod) oedd wedi peri i'r peth ddigwydd!

Beth bynnag y rheswm, mae'r deisen a'r digwyddiadau o'i chwmpas wedi gwneud Nadolig 2008 yn un arbennig iawn yn El Castillio. Bydd yn un y bydd y teulu yn cofio amdano am hir iawn!

Am El Jefe ei hun, mae'n llawenau fod pethau bach fel hyn yn gallu digwydd, a bod yn fodd i bobl fel ni gael ein hatgoffa o'r rheswm pam yr ydym yn dathlu!

A tydio'n sbort, gyfeillion!!

Anrheg annisgwyl, ond da!

A pwy meddech chwi yw hwn? Dyma'r hanes.

Derbyniodd El Jefe y cymeriad hwn yn anrheg gan Rebelde, sef mab #3, ar fore dydd Nadolig.

Wrth ei roi iddo, meddai'r mab, '¡Cuándo vi este, pensé en usted!' (yr hyn o'i gyfieithu yw, 'Pan welais hwn, meddyliais amdanat ti!')

Agorodd El Jefe'r anrheg yn ofalus, a gwirioni ag ef ar unwaith!

Gall deithio gydag El Jefe yn y car; gall fynd i bwyllgorau a chynadleddau, i gyfarfodydd a digwyddiadau. Nid oes llawer o anrhegion y gallwch wneud cymaint o ddefnydd a hyn ohonynt, ond mae hwn yn sicr yn un ohonynt.

Wrth gwrs, mae'n werth nodi nad Iesu sentimental, siwgwrllyd a diymadferth mo hwn, ond 'Action Figure', y math Iesu y mae angen i ni weld llawer iawn mwy ohono, a chlywed llawer iawn mwy amdano, yn y Gymru sydd ohoni heddiw!

Awn ati, bobl! Action!

Onestrwydd El Jefe!

Gobeithio i chwi i gyd gael Nadolig wrth eich bodd, a bwyta mwy na digon!

Rhag ofn i rywun dybio mai llenwi gofod y mae El Jefe pan yn profi safon ac ansawdd nionod picl, dyma ddangos i chwi ran o fwrdd swper El Castillo (cartref El Jefe) dros y Nadolig hwn.

Sylwer ar yr amrywiaeth gyfoethog o ddanteithion sydd ar y 'gweinydd mud' (y bwrdd crwn y mae'r potiau arno, ac sy'n troi er mwyn i chwi fedru dewis eich potyn).

Sylwer hefyd fod y potyn nionod picl yn y ffrynt bron yn wag! Da o beth, felly, fod gan El Jefe ddau botyn arall yn llechu tu'r cefn!

Ymlaen â'r dathlu a'r gwledda!

Nadolig Peladito

Mae Peladito a Bojas Rojas yn dathlu eu Nadolig cyntaf gyda'i gilydd yn El Roble Torcido.

Ar gyfer y dathlu, maent wedi cael coeden go iawn! Da iawn chi, P & BR!

Sylwch hefyd faint o anrhegion mae P wedi eu prynu i BR!

Trw lyf!

Nadolig llawen iawn i chi eich dau!

Wele!

Mae El Jefe eisoes wedi defnyddio'r gair wrth gyfarch ei ddarllenwyr a dymuno iddynt 'Nadolig Llawen', ond dywedwch i mi, pam mae 'Wele' yn air mor arbennig o addas ar gyfer yr adeg hon o'r flwyddyn?

Siocled i weinidogion a ffyddloniaid!

Mae El Jefe'n gweld fod cwmni Cadbury oedd, ar y dechrau, yn gwmni Cristnogol (Crynwyr), wedi dod a siocledi arbennig allan ar gyfer gweinidogion a ffyddloniaid y ffydd yng Nghymru heddiw!

Mwynhewch!

Nadolig Llawen i chi i gyd!

Nadolig llawen iawn i bawb sy'n darllen y tudalennau hyn!

Do, daeth yn amser i ddathlu unwaith eto, a dymuniad El Jefe yw rhannu gyda chwi dros yr ŵyl rai o'r pethau, a'r delweddau, fydd yn peri llawenydd iddo.

Cymerwch, i ddechrau, y deisen hon - nid yn llythrennol, wrth reswm, oherwydd teisen El Jefe a'i deulu yw hi!

Fe'i cafwyd yn anrheg gan un y mae El Jefe yn cydweithio â hi; digon i chwi yw gwybod mai 'Wendy' yw ei henw, ac mai hi yw'r gogyddes deisennau orau yng Nghymru, os nad yn Ewrop gyfan!

Mae'n werth sylwi ar y manylion - clamp o deisen gydag eisin gwyn drosti fel eira. Wrth ei hochr, wele fugail a dafad, ac ar ei phen, angel, Mair a Joseff, a'r BJ!

Welsoch chi erioed deisen harddach? Mae teulu El Jefe wrth eu bodd ac yn diolch i Wendy. Y trafferth yw na allwn gadw'r deisen, a'i bwyta. Dyma, felly, fydd deilema cyntaf y Nadolig! Beth wnawn ni?

Ei bwyta, wrth gwrs (ond nid y bobl sydd arni, na'r BJ!).

Nadolig llawen bawb!

Gwastraff arian

Yn gynnar ym mis Rhagfyr, prynodd El Jefe gwdyn bach i ddal ei deleffon. Yn Tesco y gwelodd o'r cwdyn hwn, cwdyn oedd yn ffitio dros ei felt ac yn cuddio'r teleffon o dan ei fol.

Nid yw eto'n 'Ddolig, ac edrychwch beth sydd wedi digwydd i'r cwdyn! Mae un o'r strapiau sy'n dal y teleffon wedi torri!

Mae hyn yn esbonio i El Jefe sut mae Tesco yn gallu gwneud elw mor fawr. Os yw eu cwdyn teleffon yn para llai na mis, mae angen tua 14 ohonynt i gadw eich teleffon am flwyddyn!

Os yw El Jefe'n cofio'n iawn, fe dalodd £4.95 am hwn. Dyna i chi £69.30 mewn blwyddyn (£4.95 x 14)!

Siawns na ellid gwneud un am lai na £69 fyddai'n para am byth! Ydi Tesco'n gwneud hynny? Nac ydi siwr, oherwydd mae mwy o elw i'w gael o werthu y rhai sy'n torri o fewn y mis.

Cywilydd arnynt!

Dyfarniad El Jefe

Wedi blasu a chnoi am rai dyddiau, mae El Jefe bellach wedi dod i gasgliad am y nionod picl.

Oherwydd hynny, tybia mai doeth o beth yw iddo ddweud yn awr pa nionod y mae yn eu hystyried yn bencampwyr 2008, rhag ofn y bydd rhai o'r darllenwyr am fynd allan i brynu rhai ar gyfer yr Nadolig.

Dyma'r dyfarniad: os ydych yn hoffi gwefr o chwerwedd, o surni, yn eich nionod, ewch am nionod picl ASDA (Perfect with a Ploughman's). Cewch ddau jar am £2.00. Bargen!

Os, ar y llaw arall, eich bod yn hoffi pethau ychydig yn felysach, ond nid yn ormod felly, ewch am 'Haywards, Sweet Onions'. Maent yn ardderchog! Fantástico!

Edrych yn blanc!

Heddiw, daeth El Jefe ar draws hen gopi o'r 'Tyst', papur wythnosol yr Annibynwyr.

Ni wn a oedd newyddion ychydig yn brin yr wythnos yr ymddangosodd y rhifyn hwn, ond er y penawdau, syndod o absennol oedd y print.

Wedi meddwl am y peth, mae'n adlewyrchiad teg o gyflwr y dystiolaeth Gristnogol yng Nghymru yn y cyfnod diweddar.

Oes, mae rhai penawdau o dro i dro, ond ar y cyfan, ychydig o'r 'print mân' a geir, ychydig o glebran am y pethau sydd o bwys.

Wrth gwrs, mae hyn hefyd yn dangos gymaint ar y blaen i bawb arall yw'r Annibynwyr. Mae yma onestrwydd a pharodrwydd i wynebu'r sefyllfa fel ag y mae, a dyna sydd ei angen heddiw - llai o ddianc rhag realiti y sefyllfa, a mwy o fwrw iddi i geisio newid pethau.

Bywyd caled El Jefe

Pam nad oes dim yn mynd yn hawdd ym mywyd El Jefe?

Dyma ni, yn gwneud ychydig o ymchwil i ansawdd a safon nionod picl. Ar y dechrau, 'roedd El Jefe wedi tybio mai tri neu bedwar math o nionyn y byddai'n gorfod eu blasu, ond erbyn hyn, wedi iddo ymweld ag ychydig o siopau, mae'n gwybod yn wahanol!

Y sefyllfa yw fod amrywiaeth eang o nionod picl ar y farchnad, a dyma El Jefe yn awr wedi gorfod prynu rhai 'crwyn arian' a rhai 'melys'!

Er mai'r un cwmni sydd wedi eu paratoi, mae'n rhaid fod gwahaniaeth rhyngddynt. Pam arall y byddai eu lliw a'u henw yn wahanol?

Mae'n amlwg y bydd yn rhaid i El Jefe gyfyngu ar ei ymchwil nionod neu wynebu'r posibilrwydd cryf y bydd yn sal fel ci dros y Nadolig.

Gwn na fyddai neb o ddarllenwyr y tudalennau hyn yn dymuno hynny, felly dyma gyhoeddi'n swyddogol, "na fydd EJ yn prynu ychwaneg o botiau nionod picl ond yn hytrach yn canolbwyntio ar y rhai sydd ganddo eisoes."

Cyn hir, bydd canlyniad yr ymchwil hwn yn cael ei gyhoeddi, ac El Jefe yn dweud ei farn onest am amrywiaeth o nionod picl.

Diau y bydd BBC Cymru a BBC News 24 ar ei ôl, felly maddeuwch iddo os na fydd son amdano am ychydig dyddiau.

Cuddio y bydd El Jefe!

El Jefe'n hyrwyddo'r achos!

Cafodd El Jefe anrheg Nadolig cynnar eleni, a hynny gan mab #3, Rebelde.

Fel y gŵyr rhai ohonoch, mae Rebelde yn wneuthurwr offer ysgrifennu o safon, a daeth at El Jefe a dweud ei fod wedi gweld yr union beth ar ei gyfer.

O'i boced, tynnodd allan y beiro hwn, beiro a wnaethpwyd ganddo ef ei hunan.

Sylwer ar y crefftwaith yn gyntaf gan fod y beiro wedi ei wneud allan o goedyn, ond sylwer wedyn ar y symbol Cristnogol sy'n addurno'r beiro!

'Defnyddia hwnna,' meddai Rebelde, 'Fe fydd yn hysbyseb dda i mi.' A gwir y dywedodd! Bob tro y mae El Jefe yn tynnu'r beiro hwn allan o'i boced mewn cyfarfod, mae rhywun yn siwr o ofyn o ble mae wedi dod, ac mae'r sgwrs am fusnes a chrefft Rebelde yn cychwyn!

Yr unig broblem yw fod un person wedi gofyn ai gan drefnydd angladdau yr oedd El Jefe wedi ei gael! Tydio'n beth rhyfedd fod arwydd sy'n golygu 'bywyd' i Gristnogion yn golygu 'marwolaeth' i eraill.

Mae'n amlwg fod rhywbeth o'i le ar y modd mae Cristnogion yn cyfleu eu neges, ond mae beiro Rebelde yn rhoi cyfle i El Jefe ddweud rhywbeth bach i unioni hynny.

Diolch, Rebelde!

El Jefe mewn picl!

Diau y bydd darllenwyr ffyddlon y tudalennau hyn yn falch o ddeall fod ymchwil El Jefe i safon ac ansawdd nionod picl ar gyfer y Nadolig yn parhau!

Fe welwch yn y llun ei fod wedi cael tri potyn arall i'w hychwanegu at yr un a gafodd beth amser yn ôl o ASDA. Lled foddhaol oedd hwnnw, ond ar adeg eu blasu yr oedd yn rhy gynnar i ddod i unrhyw gasgliad pendant.

Y tri nesaf yw 'Tesco Spiced Vinegar', 'Haywards Traditional Onions', a 'Tesco Traditional'. Cawn weld beth fydd El Jefe yn feddwl ohonynt.

Bydd yr ymchwil yn cymryd ychydig o amser, wrth reswm, gan nad yw El Jefe'n awyddus i gael camdreuliad. Wrth ymwneud â nionod picl, mae'n bwysig talu sylw manwl i ganllawiau 'Iechyd a Diogelwch' gan fod i arbrofion fel hyn elfennau sy'n cyffwrdd â chynhesu global a nwyon tocsig.

Gwell peidio â manylu ymhellach, neu bydd El Jefe mewn picl go iawn!

Bargen!

Cafodd El Jefe e-bost heddiw yn cynnig y fargen ganlynol (wir!):

December Offers

USA on Sale now from only £298*

O ystyried y sefyllfa economaidd yno, pwy fyddai eisiau'r lle?

(* Dylid esbonio mai cwmni awyrennau oedd yn hysbysebu.)

N’ôl at y ‘Dolig!

Deallwch hyn, mae El Jefe yn hoff iawn o gig oer. Nid oes ganddo fawr amynedd gyda'r bobl hynny sy'n bwyta dim ond llysiau. 'Pwy sydd eisiau edrych fel sbrigyn o seleri?' oedd ei gwestiwn rhywdro pan ddaeth wyneb yn wyneb ag un o'r cyfryw rai!

Beth bynnag am hynny, ar adeg y Nadolig mae'n rhaid wrth ddanteithion gyda'r cig oer, yn eu plith yr hyn a elwir yng Ngogledd Cynru yn 'nionod picl'. Ond y cwestiwn yw, 'Pwy sy'n gwneud y nionod picl gorau?'

Mae hwn yn rhywbeth y mae El Jefe am ymchwilio iddo yn ystod yr wythnosau nesaf. Fel y gwelwch, mae eisoes wedi prynu (a bwyta) jar o Asda, ac mae un arall ganddo o Morrisons. Cyn hir, bydd yn cael un o Tesco, ac o fannau eraill hefyd.

Nid yw am gyfyngu ei ymchwil i gwmnïau mawrion. I'r gwrthwyneb, mae'n awyddus i flasu cymaint o engreifftiau o nionod picl ag sy'n bosibl. Oherwydd hynny, os ydych yn gwneud eich nionod picl eich hun, beth am roi jar i El Jefe i gael ei farn?

Anfonwch e-bost yn nodi eich enw, eich cyfeiriad a'ch rhif teleffon, ac fe ddaw El Jefe i gysylltiad â chwi. (Heb y manylion a nodwyd, ni fydd yn cyboli!)

Yn ôl at y picls rwan! ¡Navidad Alegre!

Rybish, 'ta be?

Mae El Jefe yn gweld y pethau rhyfeddaf wrth deithio!

Beth, meddech chi, mae'r lori yma'n ei gario?

Oedd angen dweud hynny ar ei chefn?

Mae'r Nadolig yn dod!

Mae'n Ragfyr y cyntaf, ac mae'r Nadolig yn dod!

Mae El Jefe yn edrych ymlaen! Beth amdanoch chi?

Os ydych am gwyno mai llun o Sion Corn sydd gan El Jefe yn hytrach na llun 'Cristnogol', anfonwch eich e-bost at sion-corn@gwlad-yr-ia.com

Prin fod angen ychwanegu na fyddwch yn derbyn anrheg ganddo wedyn!

Ho, ho, ho!

Le-bei!

Ar ei ffordd adref yr oedd El Jefe unwaith eto pan deimlodd ei hun yn mynd yn gysglyd!

Ac yntau'n teithio rhwng Corris a Dolgellau, dyma dynnu i mewn i'r le-bei ar ben bwlch Tal-y-llyn, diffodd yr injian a dechrau pendwmpian! O! mor felys oedd y cwsg!

O hyn ymlaen, nid 'le-bei' y bydd El Jefe yn galw'r llecyn hwnnw, ond 'le-bei-bei'!

Zzzzzzzzzz!!

Da 'te?

O'r diwedd, mae El Jefe wedi dod o hyd i'r union beth y mae capeli Cymru ei angen!

Mae'n naturiol, yn iachus, yn rhad ac yn hawdd ei ddefnyddio. Yr unig beth sydd angen i chwi ei wneud yw eistedd ar eich pen ôl a'i sipian.

Fe y dywedais, addas iawn ar gyfer pobl capeli Cymru, ynte?

Near miss!

Dyma sut olwg fyddai wedi bod ar gar El Jefe nos Iau diwethaf, oni bai am ei feddwl chwim!

Teithio adref yr oedd, ac wedi dod i Finffordd ger Porthmadog. Yr oedd ychydig wedi 10.00pm ac yntau'n gyrru ar 30 milltir yr awr (wir!) allan o'r pentref. Yn sydyn, penderfynodd y car y tu ôl iddo ei basio, ond pan oedd y ddau gar ochr yn ochr, dyma gar arall yn dod rownd y gornel i'w hwynebu! 'Doedd dim amdani ond derbyn ein bod yn mynd i gael 'head-on'!

Ond dyma lle y gwelwyd meddwl chwim El Jefe! Mewn ymdrech i arbed ei hun, gyrrodd ei gar ar y palmant, a thrwy hynny wneud lle i gar y mwnci oedd yn ceisio'i basio. Symudodd hwnnw yn ôl i'r ochr iawn o'r ffordd, a phasiodd y trydydd car, yr un oedd yn mynd i'r cyfeiriad arall, yn ddiogel ond gan ganu ei gorn a fflachio ei oleuadau yn ffyrnig!

Stopiodd El Jefe, a'r troseddwr! Ond gredwch chi beth ddigwyddodd nesaf? Penderfynodd y troseddwr yrru i ffwrdd heb ddweud na 'diolch' na 'mae'n ddrwg gen i'! Aeth El Jefe ar ei ôl, a chodi ei rif.

Mae Heddlu Gogledd Cymru yn awr yn edrych i mewn i'r mater.

Mab y Gadair!

Bu El Jefe am dro ddoe i El Roble Torcido lle mae Peladito a Bojas Rojas yn byw. Gwaetha'r modd nid oedd BR yn gymaint o Bojas Rojas ag arfer, oherwydd yr oedd yn anhwylus a sâl, ac o ganlyniad yn welw.

Beth bynnag am hynny, mae eu cartref, La Tienda Vieja, wedi ei weddnewid yn ddiweddar! Nid yr un profiad yw galw yno bellach, nac aros yno chwaith!

Fe'ch clywaf yn gofyn, 'Beth sydd wedi digwydd?', a'r ateb yw fod Peladito wedi dod yn Fab Cadeiriol; mae ef a Bojas Rojas wedi prynu dwy gadair a soffa!

Fel dyn sy'n dioddef o 'la enfermedad de banco de iglesia', mae hyn wedi dod fel rhyddhad mawr i El Jefe. Lle gynt yr oedd cadeiriau a mainc galed, yn awr y mae cyfforddusrwydd braf.

Diolch Peladito a Bojas Rojas! Eistedded y hijo y nuera yn hedd y sillas newydd!

I-tap

Rhag ofn i chi feddwl mai mewn gwestai moethus yn unig y mae El Jefe yn aros, mae'n rhaid iddo ddweud wrthych am un gwesty y bu'n aros ynddo'n ddiweddar ym mhrifddinas Gwlad y Menyg Gwynion. Ei enw oedd 'I-tap'!

Wele lun o'r ystafell! Yr oedd yn debyg i gell, a'r syniad oedd fod dau yn cysgu yn y gwely, ac un arall wedyn uwch eu pennau yn y bync!

'Nefar in Ewrop or Sowth America,' meddai El Jefe wrtho'i hun! Byddai'n rhy beryglus o lawer gydag aelodau o'i deulu ef! Pe byddai mab yn cymryd at y bync, byddai wedi rowlio allan cyn y bore a disgyn ar El Jefe a Mujer Superior. Gan fod y tri mab yn hogiau heffdi, gallai'r fath gwymp achosi loes ddifrifol. Nid 'tap' fyddai, ond coblyn o swadan hegar.

Oni ddylid galw y gwesty yn 'I-swadan' felly, yn lle, 'I-tap'? Dyna fyddai fwyaf addas!

Tystiolaeth!

Mae El Jefe yn amau nad yw ei ddarllenwyr hoff yn credu pa mor arw oedd hi yn Aberystwyth pan oedd yno'n ddiweddar!

Cyn gadael y gwesty, tynnodd y llun hwn allan drwy ffenestr ei ystafell (gwydro sengl). Gellir gweld yn glir pa effaith yr oedd y gwynt wedi ei gael ar y coed bychain ar y balconi - yr oedd y cyfan wedi mynd yn gam, yn gorfod ymdopi a bod wysg eu hochr!

Wrth gwrs, mae El Jefe yn gobeithio nad oes angen dweud fod y coed wedi eu clymu i ffens y balconi! Os nad oeddech chi wedi gweithio honna allan, mae yna le i boeni am eich hachos chi!

Rhewi!

Dywedwch a fynnwch chi, lle oer yw Aberystwyth y dyddiau hyn!

Hyd yn oed pan fyddwch yn eistedd mewn gwesty ar y prom ac yn edrych allan dros y mor, os nad oes gwydr dwbl yn y ffenestr, credwch fi - mae'r awelon main yn gwthio i mewn ac yn wafftio'n rhewllyd o'ch cwmpas!

Peidiwch a cheisio dadlau gydag El Jefe wrth iddo ddweud hyn! Mae'n digwydd yn awr wrth iddo deipio'r geiriau hyn!

Brrrrrrrrrrrr!!

Hmmmmmmmmm!

Tra'n cydnabod fod yna lawer iawn o ryfeddodau i'w gweld yn y dwyrain, ac fod Taiwan yn ynys hynod iawn, mae'n rhaid i El Jefe gyfaddef nad oedd popeth yr oeddent yn ei baratoi ar gyfer ei fwyta yn apelio ato.

Dyma olygfa y daeth ar ei thraws ar ochr y stryd. Nid yw'n gwneud cyfrinach o'r ffaith ei fod wedi teimlo'n reit doji am beth amser wedyn ac wedi cael trafferth i feddwl am fwyta unrhyw beth o gwbl.

O graffu yn y fowlen, mae'n fwy na phosibl y byddwch yn deall pam!

Bydd El Jefe'n ôl yn fuan!

Gobeithio y byddwch yn falch o glywed fod El Jefe'n dod yn ei flaen yn ardderchog yn dilyn ei afiechyd blin, a'i fod yn mynd i fod yn holliach yn fuan iawn!

Pan ddigwydd hynny, bydd yn dod yn ôl i'r tudalennau hyn i'ch diddanu.

'El Jefe is out of danger and comfortable'

Ymddiheuriadau unwaith eto, ond mae El Jefe yn dal mewn gwendid a than afiechyd.

Bydd yn dod yn ôl at ei ddarllenwyr hoff cyn gynted ag y bydd yn gallu.

Cofion cynnes atoch i gyd,

Mae'r dyn mewn gwendid!

Mae El Jefe yn sâl ac angen cydymdeimlad!

Bydd yn ôl gyda chwi wedi iddo wella.

Llogi

Heddiw, ar ei daith yn ôl o aeropuerto Manceinion, wedi iddo ffarwelio â Bandido, gwelodd El Jefe y cerbyd hwn.

Daeth cwestiwn i'w feddwl.

'Beth sy'n digwydd os mai dim ond pedwar yr ydych yn dymuno eu llogi?'

Dyrys!

Ar daith

Yfory, mae Bandido, ail fab El Jefe a Mujer Superior, yn mynd i Japan.

Mae'n mynd yno i roi arddangosfa o waith cerfio, a hynny ar wahoddiad cwmni o siopau yn y wlad.

Gwyn ei fyd, a phob dymuniad da iddo ar ei daith.

Cwestiwn!

Beth ddigwyddodd fan hyn, 'ta?

Beth ydi'r ysfa?

Yr wythnos hon bu El Jefe yn Coventry.

Fe gofiwch i'r ddinas gael ei bomio'n ddi-drugaredd gan yr Almaenwyr yn ystod yr Ail Ryfel Byd ac mai un o'r adeiladau a chwalwyd oedd yr Eglwys Gadeiriol.

Mae'r adfail yno o hyd i atgoffa pawb o'r hyn a ddigwyddodd.

Wrth ochr yr hen adeilad, codwyd Eglwys newydd. Mae'n adeilad anferth, ac mae'r tu mewn yn wirioneddol hardd, fel y gwelwch. Nid yn unig y mae yno waith celf sy'n cipio'r anadl, mae yno hefyd ffenestri lliw gyda'r gorau a welodd El Jefe erioed. Nid oes gennym ddim tebyg i hyn yn yr hen wlad, Patagonia.

Ond pam, o gofio costau cynnal a chadw'r fath adeilad, yr adeiladawyd adeilad mor fawr, mor wych? Beth ydi'r ysfa sy'n peri fod pobl yn gwneud hyn? Mae'n ddirgelwch llwyr i El Jefe!

Oni all shed fod yn gysegr i'r sawl sy'n ceisio Duw yn gymaint ag unrhyw Eglwys Gadeiriol grand? Ac os oes angen lle i dyrfa, wel, yr ateb amlwg i El Jefe yw cael shed fwy . . .

. . . ond nid un mor fawr ag Eglwys Gadeiriol Coventry! Mae hynny'n sicr!


Tybed fyddai ymateb gweithwyr cwmni Watkino Jonso i sylw fel yna? (He, he!)

Dirgelwch!

Pam fod lori gario ceffylau yn gorfod bod ag arwydd arni sy'n dweud 'Caution Horses'?

Wrth deithio o amgylch y wlad, ni fydd El Jefe byth yn gweld lori ag arni arwydd yn dweud 'Caution Sheep' neu 'Caution Cows'.

A pham fod angen 'Caution'? Ydi ceffyl yn fwy perygus na tharw?

Ac os yw'r ceffyl mewn lori, onid ydi pawb yn ddiogel? Ai y pryder yw fod y perchenog wedi anghofio cloi cefn y lori'n iawn?

Os felly, nid y ceffyl yw'r perygl, ond y perchenog!

Mynd yn hen

Heddiw, mae El Jefe'n cael ei benblwydd.

Peidiwich a theimlo'n euog am beidio gyrru cerdyn iddo; dathlu'n dawel y bydd, a hynny yng nghwmni Mujer Superior.

Tydio'n beth rhyfedd fod pobl yn cwyno oherwydd eu bod yn 'mynd yn hen'.

Oni ddylem fod yn ddiolchgar ein bod ni'n fyw o gwbl, oherwydd rwy'n siwr y gall pob un ohonom feddwl am rywun fu farw'n ifanc ac na chafodd y fraint a gawn ni o basio un garreg filltir ar ôl y llall dros gyfnod maith?

Mae pob penblwydd yn rhywbeth i lawenhau ynddo, beth bynnag yw ein hoed.

'Penblwydd hapus' i mi fy hun felly!